我寫了一段文字,想把它變成幻燈片式的影象,有冇人有興趣幫手?
乜野係廣深港高速鐵路?
終點站是廣州石壁及香港西九,途經深圳的福田、龍華及東莞的虎門,車程只需四十八分鐘。
點解要起廣深港高速鐵路?
一個字,快!
為了要一個小時之內,在珠三角可以周圍走… …
咁香港人咪去廣州及珠三角等地會更方便快捷?
但係,香港只有一個站… …
吓?
係!西九站。
如果你住係西九的豪宅,就真係好快,不過,… …
但係,如果你住係天水圍、元朗、屯門,你會唔會咁蠢,坐成一個至大半個鐘搭去西九,再坐高速火車去廣州?
如果你住係新界東,你都唔會,因為直接去羅湖仲快。
但係,全香港人口增長最快的地區,就係新界地區!
咁即係,香港會有好多人根本用唔著呢條鐵路!
咁點解仲要花成四百億,即係每位香港小市民要俾接近六千蚊,去起呢條鐵路呢?
咁鐵路係唔係吸引更多珠三角居民來港呢?
珠三角居民宜家黎香港,大約只需二至一小時,時間再縮短,係唔係就咁大吸引力呢?
而且,吸左去邊度呢?
吸左去西九,因為只得西九一個站。
即係人流會更往香港市中心聚集。
咁其他地方呢?
吸引力好似無增加到幾多喎,尤其係缺乏就業及商業機會的新界西。
所以有人問,鐵路穿過新界西,但係,點解唔整個中間站,例如錦上路?
政府話,咁樣車速會慢左。
慢左幾多?
都係十四分鐘左右啫。
咁快黎做乜?未又係趕住去西九同市中心其他地方囉。
咁樣,市中心旺哂就得喇!唔駛理其他人?
咦,唔係喎,點解條鐵路係深圳又會有兩個站?
一個係福田,一個係龍華,距離十幾公里咋,短過新界西出西九好多好多。
超!火車開行未夠五分鐘又要減速停車喇!
老友,點解深圳兩個站唔會阻慢條高速鐵路?
我地話起個新界西既站,就話會阻慢呢?
有人話,基建係會帶動香港經濟既。
例如西九龍文娛藝術區。
喂,究竟珠三角係唔係好多人,要趕住黎西九文娛藝術區睇Phantom of the Opera?
唔知喎。
係唔係西九同市中心既樓仲唔夠貴,要吸引多D大陸大款黎香港再買貴佢?
吓?
定係要搵條鐵路谷下深圳、東莞、廣州既樓市?
如果係咁,最後係邊個得益?
唔通又係地產商?同搞工程既公司?
咁駛唔駛搵小市民笨,要貼錢俾佢地黎搞呀!?
除左好可能多D人會
﹣黎香港市中心一日遊,
﹣黎shopping,
﹣炒貴香港D豪宅,
究竟條鐵路要黎搞乜鬼?
邊個議員夠膽支持俾錢起呢條建路,
就唔駛旨意我地小市民會投佢一票!